O acto institucional celebrouse no Círculo das Artes, coincidindo coa tradicional homenaxe que o Orfeón Xoán Montes dedica cada ano ao insigne compositor lucense na festividade de San Xoán.
O Concello de Lugo oficializou esta tarde o nomeamento de Xoán Montes Capón como Fillo Predilecto da cidade. O acto, celebrado no Círculo das Artes, culmina o procedemento aprobado por unanimidade pola Corporación municipal o pasado 28 de maio, en resposta a unha demanda social amplamente compartida.
A iniciativa, impulsada polo Orfeón Xoán Montes e rexistrada en outubro de 2025, contou co respaldo unánime de diversas entidades clave da cidade, como o Conservatorio Profesional de Música que leva o seu nome, a Banda Municipal, o Círculo das Artes, o Seminario Diocesano e outras agrupacións musicais e educativas.
Un legado que perdura
Un legado que perduraDurante a súa intervención, a alcaldesa, Elena Candia, destacou a figura do homenaxeado como un alicerce imprescindible da identidade colectiva de Lugo e de Galicia: “O legado de Xoán Montes segue vivo e continúa inspirando xeración tras xeración”.
Pola súa banda, Miguel Varela, presidente do Orfeón Xoán Montes, cualificou o recoñecemento como un “acto de xustiza histórica”. Varela subliñou que a distinción non só premia a un músico excepcional, senón tamén a un cidadán que proxectou o nome de Lugo ao máis alto nivel cultural. “Agardamos que a súa memoria siga lembrándonos que a cultura é a maior riqueza dun pobo”, engadiu.
Unha entrega simbólica
Un dos momentos máis emotivos da xornada foi a entrega en custodia do título de Fillo Predilecto ao Conservatorio Profesional de Música Xoán Montes, representado polo seu director, Borja Durán. Este xesto simbolizou a cesión da responsabilidade de preservar e transmitir o legado do compositor ás novas xeracións de músicos lucenses.
O acto concluíu cunha brillante actuación musical na que participaron a agrupación Son de Lugh, a Banda Filarmónica de Lugo e o Orfeón Xoán Montes, pechando a homenaxe coa interpretación da inmortais notas de Negra Sombra.
