O Concello de Lugo continúa reforzando a súa programación estival co obxectivo de promover hábitos de vida saudables, o envellecemento activo e o lecer en familia. A última das iniciativas é un novo programa de ximnasia ao aire libre, totalmente gratuíto e de acceso libre sen necesidade de inscrición previa, pensado para facilitar a participación de toda a veciñanza.
As clases de ximnasia impartiranse durante os meses de xullo e agosto en dúas localizacións da cidade: na Praza de Viana do Castelo (luns e mércores, de 18:30 a 19:30 horas) e no Parque da Milagrosa (martes e xoves, ás 18:30 horas). Esta proposta súmase ao éxito doutras actividades organizadas polos centros de convivencia, como o ‘Pilates no Río’, que vén rexistrando unha elevada afluencia os luns e mércores no mesmo horario.
Ademais do exercicio físico, o Concello dinamiza as tardes de verán á beira do Miño. A contorna da piscina de Los Robles acolle esta tarde, entre as 17:00 e as 20:00 horas, unha xornada de xogos gratuítos con cinco inchables, dous deles de auga, deseñada para o desfrute dos máis novos
