Ecoloxistas en Acción amosou a súa repulsa ante a brutal agresión sufrida por un matrimonio de arredor de 60 anos e os seus dous fillos na cafetaría dun coñecido hotel de Pontevedra, tras participar na manifestación antitaurina convocada pola plataforma Touradas Fóra de Pontevedra.
Segundo denuncia a organización ecoloxista xunto con outras entidades sociais, os feitos aconteceron cando a familia acudiu ao establecemento na busca de refrixerio e uso dos servizos sanitarios. Nese momento, un grupo de máis dunha ducia de persoas, entre os que se atopaban toureiros e membros das súas cuadrillas aloxados no hotel, increpou, insultou e agrediu fisicamente aos integrantes da familia polo mero feito de levar camisetas coa lema «Tauromaquia Abolición».
Segundo consta nos partes médicos de urxencias, as vítimas sufriron golpes no tórax, na cara e nas pernas froito dos empurróns, coaccións e agresións directas executadas polo grupo. Ante a gravidade da situación, a familia alertou ao 112, o que mobilizou ata o lugar a unha dotación da Policía Nacional e a unha ambulancia para atender aos feridos.
Oposición social á tauromaquia e ás axudas públicas
Desde Ecoloxistas en Acción puxeron en valor o civismo e o carácter pacífico da cidadanía galega na masiva mobilización do pasado sábado 8 de agosto contra a tortura animal na praza de touros pontevedresa.
A organización sinalou que o éxito da convocatoria evidencia a profunda desconexión da sociedade galega coa normativa autonómica actual —que exclúe a tauromaquia da lexislación sobre maltrato animal—, así como co financiamento público que estas actividades reciben por parte da Deputación Provincial de Pontevedra. A entidade cuestiona que se continúe a considerar a tortura animal como un feito cultural ou duns hipotéticos valores turísticos.
Ecoloxistas en Acción e o resto de organizacións convocantes trasladaron a súa total solidariedade coa familia agredida, apoiando a denuncia presentada e amosando o seu rexeitamento absoluto a uns comportamentos violentos que consideran indignantes e inaceptables.
