O Grupo Parlamentario do PSdeG exixirá a comparecencia urxente no Parlamento do conselleiro de Emprego, Comercio e Emigración, José González Vázquez. A decisión, anunciada pola secretaria de Organización socialista, Lara Méndez, prodúcese tras coñecerse a proposta de sanción da Inspección de Traballo a unha empresa do grupo familiar da adega Casal de Armán (O Ribeiro) por empregar a dous traballadores de orixe africana sen autorización laboral durante a pasada vendima.
«O primeiro que imos pedir é a comparecencia do conselleiro. Que veña dar a cara el», aseverou Méndez, quen criticou a dobre moral do titular de Emprego: «Non se cortou nada ao falar de inmigración ordenada e reclamar competencias de traballo, mentres nas viñas da adega da súa familia había dous traballadores sen papeis». A dirixente socialista tamén interpelou directamente ao presidente da Xunta: «Que vai facer o señor Rueda? Seguir pechando os ollos ao que pasa na súa casa?».
Resumo da iniciativa e asuntos do PSdeG para o vindeiro Pleno
Sesión de control e política social
- Pregunta ao presidente: José Ramón Gómez Besteiro interrogará a Alfonso Rueda sobre as medidas para garantir a igualdade efectiva dos dereitos de todos os galegos, independentemente de onde residan.
- Menores migrantes: Pregunta urxente á Xunta sobre os recursos e accións previstas para a acollida de menores non acompañados procedentes de Ceuta.
- Política de bonos: Interpelación polas restricións e o carácter retroactivo das condicións do Bono Concilia, denunciando que exclúe ás familias con prazas en campamentos municipais e favorece unicamente á oferta privada.
Financiamento autonómico e débeda
- Moción de financiamento: O PSdeG insta á Xunta a defender unha posición propia que inclúa a revisión do cálculo da poboación axustada (envellecemento, dispersión e custo dos servizos) e a negociar bilateralmente co Estado.
- Quita da débeda: O grupo esixe a aceptación formal da quita de 4.010 millóns de euros da débeda autonómica proposta polo Goberno central.
Sanidade, educación e servizos públicos
- Transparencia en listas de espera: Proposición non de lei para obrigar ao Sergas a computar o tempo real e íntegro de agarda dende que se solicita a cita, publicando tamén as listas «non estruturais» (as persoas pendentes de chamada).
- Residencias universitarias: Iniciativa para duplicar a oferta pública de prazas ata acadar como mínimo o 10 % do alumnado matriculado en cada universidade galega.
- Infraestruturas e seguridade:
- IES Frei Martín Sarmiento (Pontevedra): Demanda dun plan integral de reforma ante problemas de masificación, illamento e falta de persoal de apoio.
- Praia das Catedrais: Pregunta sobre a revisión do sistema de acceso e seguridade tras os recentes colapsos e peches temporais por masificación no areal.
