O centro universitario organiza do 18 ao 24 de novembro un curso en liña para ofrecer ferramentas que faciliten a comunicación coas persoas con demencia e melloren a súa calidade de vida e a de quen as coida.
Unha mirada, un xesto ou unha caricia poden dicir moito máis ca as palabras cando o alzhéimer e outras demencias dificultan a comunicación. Aprender a interpretar estas sinais e manter a conexión emocional coas persoas afectadas é o obxectivo do novo curso que a UNED de Lugo celebrará entre o 18 e o 24 de novembro baixo o título «Cuando las palabras no bastan: aprender a comunicarnos con personas con demencia y Alzheimer».
A perda progresiva da linguaxe é unha das dificultades ás que se enfrontan as persoas con demencia e as súas familias. A imposibilidade de expresar necesidades, emocións ou malestar pode provocar frustración, illamento e un maior desgaste nas relacións de coidado. Por iso, a formación aposta por unha comunicación que vaia máis alá das palabras e dea protagonismo aos xestos, ao contacto visual e á comprensión emocional.
Ao longo de catro sesións, os días 18, 19, 23 e 24 de novembro, o alumnado coñecerá as principais alteracións comunicativas asociadas ás demencias e aprenderá estratexias para adaptar a comunicación ás distintas fases da enfermidade, interpretar determinados comportamentos e favorecer unha relación máis próxima coas persoas afectadas.
A encargada de impartir a formación será M. Carmen Rivas Fernández, experta en transformación social e atención sociosanitaria, que abordará tanto os fundamentos da comunicación como as pautas prácticas para mellorar a convivencia e os coidados.
O curso está especialmente dirixido a familiares, persoas coidadoras e profesionais sociosanitarios, aínda que permanece aberto a toda a cidadanía. Desenvolverase integramente en liña, con posibilidade de seguimento en directo ou en diferido, e contará con 20 horas lectivas e recoñecemento de 1 crédito ECTS.
A iniciativa intégrase no ciclo «Salud y Cuidados», co que a UNED de Lugo continúa achegando á sociedade formación sobre cuestións de saúde, benestar e atención ás persoas.
A actividade está dirixida por María del Carmen Caldeiro Pedreira e coordinada por Raquel Iglesias Rodríguez, coordinadora de Extensión Universitaria da UNED de Lugo, e conta coa colaboración do Concello de Lugo e da Deputación de Lugo.
A matrícula permanece aberta, cun prezo ordinario de 40 euros e tarifas reducidas para determinados colectivos. As persoas interesadas poden obter máis información a través do teléfono 982 280 202 ou do correo electrónico info@lugo.uned.es.
