Décimo cuarta xornada de liga, sexta consecutiva fóra da casa por culpa dun estraño calendario e o Ineltrón Santo Domingo Betanzos, líder invicto da Primeira División, viaxa ata Lugo para enfrontarse ao Ensino, conxunto que aínda non coñece a vitoria. Por parte do cadro betanceiro non se esperan demasiadas dificultades, aínda que a mocidade do equipo rival, con xogadores vinculados a equipos de categorías superiores, aconsella non baixar a garda.
O partido terá lugar o sábado 20 ás 19h na capital lucense e servirá de antesala ao regreso ao Carregal dos de Doc, que pecharán esta primeira fase da liga o vindeiro día 28 fronte ao Rosalía de Castro.
Os infantís xogan as eliminatorias previas aos cruzamentos de ascenso a Primeira
Pola súa parte, o equipo infantil, outro dos conxuntos do club betanceiro que non coñece a derrota, buscará a praza da delegación Coruña-Bergantiños-Costa da Morte para os cruzamentos de ascenso á 1ª División. A cita terá lugar cunha primeira semifinal fronte ao Cambre, o sábado ás 10h no Carregal, e continuará co partido do vencedor contra o gañador da eliminatoria Golfiños As Mariñas-Culleredo, o día seguinte. Ningún dos equipos implicados perdeu ningún partido no que vai de liga, de aí a dificultade da empresa dos de Diego Folla e Cristina Babío.
Outros partidos de interese son os dos Preinfantís contra Esclavas Coruña, os dos Mini de Primeira fronte a Compañía de María e o dos júnior fronte a Arteixo. No que toca aos equipos sénior, o feminino xoga o domingo fronte a Sarria, os B fronte a Celtas de Foz e La Goleta desprázase a Cambre.