O Santo Domingo Betanzos visita este sábado a pista do Ucoga Seguros Chantada, un dos clásicos da Liga EBA (hoxe Tercera FEB), para disputar a final da Copa Galicia. O partido, a celebrar ás 18:30 na pista chantadina, e retransmitido en directo por FGB TV, medirá os betanceiros a un conxunto, dirixido polo incombustible Alberto Fafián (18 temporadas á fronte do equipo), que pasa por ser, amais do “rei de copas”, con 6 títulos gañados (os 5 últimos, consecutivos) un dos favoritos, un ano máis, do grupo AB da Liga. Do perigo do seu roster falan ben xogadores como Carlos Noguerol, con pasado en Leb Oro e Plata, clásicos como Cristian Iglesias e os xogadores mozos, con ampla experiencia na competición, Hugo Rey, Manuel Ruano e Aarón Gómez, amais dos reforzos deste ano, Jesús Cerisuelo, proveniente do CB Enrique Soler de Melilla, e o perigoso escolta compostelán Nilo Barreiro, vello coñecido dos betanceiros.
A dificultade do encontro, que se enfronta con tres baixas, non lle escapa a Antonio Díaz “Doc”, o adestrador do Santo: “Eles son favoritos pero nós imos intentar competir e xogar un bo partido e mellorar a nosa posta a punto cara ao primeiro partido de liga. Se algo ten este equipo é espírito competitivo e estou seguro de que os xogadores que participen van dar o 100% para intentar traer a copa a Betanzos”.
Estrea dos equipos sénior masculino de Segunda e Terceira División
Polo demais, a fin de semana do 5-6 de outubro supón a estrea en competición do equipo de Segunda División autonómica e mais o de Terceira, o La Goleta Santo Domingo Betanzos: os primeiros xogan no Carregal fronte a Maristas, o domingo ás 1915h e os máis veteranos do club trasládanse deica Paiosaco para medirse ao conxunto bergantiñán ese mesmo día ás 19h. A canteira, pola súa parte, xa está en plena competición á falta de que comece o minibásquet. O júnior masculino xoga na Coruña contra Esclavas Orzán, o feminino en Ferrol contra Baxi Esteiro, mentres que os cadetes Blanco visitan Maristas, os Rojo a Santa María do Mar e as rapazas do Decornaveira esperan no Carregal, o sábado ás 12h, ao Montrove.
No que toca aos equipos infantís, o masculino de Segunda División visita o Obradoiro da Coruña o sábado ás 10h, o J.Caamaño Arquitecto de Primeira xoga en Mera contra Montrove (sábado 17h) e as rapazas de Sandra Mira e Alía Ortega enfróntase ao Golfiños en Sada o domingo á tarde.
O sénior feminino, único equipo de baloncesto grande que aínda non entrou en competición, debutará dentro de dúas semanas en Pontedeume.