O Tenente Alcalde recibiu a preto de 60 estudantes e profesores de ambos paísesArroxo agradeceu que escolleran Lugo para a súa formación
O Tenente Alcalde do Concello de Lugo, Rubén Arroxo recibiu no concello a un grupo de estudantes e profesores procedentes de Noruega e Islandia que están a realizar un intercambio no IES Ollos Grandes de Lugo a través do programa Erasmus. Arroxo agradeceu ao grupo «que escolleran Lugo para continuar os seus estudos».
O Tenente Alcalde deu a benvida aos estudantes de Erasmus e animounos a visitar Lugo máis adiante, e destacou que «Lugo conta cunha gran riqueza patrmonial, etnográfica, cultural e gastronómica, que nos converten nun sitio ideal para visitar sen sufrir as grandes masificacións de outras zonas turísticas», e engadiu «as distintas áreas da Tenencia de Alcaldía traballamos para destacar o potencial de Lugo e converternos nunha cidade referencial á hora de visitar Galiza».
Arroxo mantivo un encontro co grupo e compartiu con estudantes e profesores a historia da cidade e do Concello, ademais de amosar os restos romanos que se poden ver nas dependencias municipais.