Na primeira edición financiáronse 18 proxectos no marco desta iniciativa que permitiron, entre outras propostas, promover a nova economía dos coidados, recuperar oficios e a produción agroalimentaria e mellorar as competencias dixitais
O Diario Oficial de Galicia publica hoxe unha nova orde de axudas para o desenvolvemento de programas de voluntariado no medio rural, unha iniciativa que celebrou o pasado ano a súa primeira edición. En concreto, ofrece actividades formativas e intercambio de coñecementos para dinamizar os concellos menos poboados e mellorar as perspectivas laborais da xuventude.
Na primeira edición apoiáronse un total de 18 proxectos diferentes que permitiron poñer en contacto a mozos de entre 16 e 35 anos e persoas maiores de 55 para que poidan intercambiar coñecementos e intereses. O programa conta cun orzamento de 760.000 euros e atópase no marco do Plan de recuperación, transformación e resilencia financiada pola Unión Europea (NextGenerationEU).
O prazo de presentación de solicitudes será dun mes e estará aberto a partir de mañá. É preciso presentalas por vía electrónica a través do formulario dispoñible en www.sede.xunta.gal. Poderán solicitalas entidades de acción voluntaria tanto locais como asociativas e deberá propoñer iniciativas que teñan como escenario o medio rural.
Algún dos proxectos que se apoiaron o pasado ano estaban relacionados co intercambio de coñecementos vinculados a ámbitos como a nova economía dos coidados, a recuperación de actividades ou oficios, a produción agroalimentaria, a recuperación do patrimonio e o turismo e o deseño de modelos dixitais e tecnolóxicos.
Primeira edición
Entre os proxectos que recibiron financiación o pasado ano destacan as propostas presentadas pola Escola de Tempo Libre Colaxe e a da ONGD Senvalos. Nelas, as persoas voluntarias participaron en actividades de acompañamento, asistencia ás familias, envellecemento digno, de conectar coas novas tecnoloxías e de agricultura ecolóxica.
Así mesmo, e máis centrado no ámbito da produción agrícola e a inserción laboral, están a proposta da Asociación Os Tres Reinos, para promocionar o cultivo ecolóxico e a transformación do centeo da Mezquita dun xeito tradicional; e o proxecto de Valores Innovation, que puxeron en contacto a persoas desempregadas con persoas maiores que necesitan coidados, ademais de traballar na promoción do turismo rural e en accións de cohesión tanto tecnolóxica como dixital.
O resto de entidades de acción voluntaria que contaron con estes fondos da Xunta para levar a cabo as súas iniciativas son: a Fundación Amigos de la Barrera, coa proposta ‘E ti,, de quen vés sendo’ para a promoción da riqueza social, cultural e ecolóxica; a Fundación Eduardo Pondal, con ‘Os tempos son chegados. O teu talento, o meu futuro’ para impulsar novas iniciativas de emprendemento rural coa recuperación de oficios tradicionais; a Asociación Esgaia Inserta, que contempla no seu proxecto ‘O can na horta’ actividades de coidado de animais de compañía, promoción da adopción e creación dunha horta ecolóxica; e a Federación de centros xuvenís Don Bosco, que con ‘Contaxia Experiencia’ quere dar a coñecer á xente nova as oportunidades do medio rural a través de obradoiros de cociña, roteiros culturais e paisaxísticos, a recuperación de oficios tradicionais como a cestaría ou da música tradicional.
Concellos
Entre as entidades locais, destacan os proxectos realizados de maneira conxunta polos Concellos de Monterrei e Cualedro e o impulsado polos de Vilar de Barrio, Laza e Xunqueira de Ambia. En cada un deles participaron ata 42 mozas e mozos voluntarios, que se encargaron de recuperar experiencias das persoas maiores destas localidades, acompañalas e axudalas nos seus fogares, así como guialas no manexo das novas tecnoloxías de información e comunicación.
Outras Corporacións locais con iniciativas que foron financiadas por este programa da Xunta son: a de Nogueira de Ramuín, cunha proposta centrada no coidado de rutas de sendeirismo; a de San Xoán de Río, para promocionar os cultivos ecolóxicos, protexer a diversidade e promocionar o turismo; a de Ames, con obradoiros de memoria e gravacións de vídeo con fin de fomentar o encontro entre a veciñanza; ou a de Vedra, que procura coa súa proposta promover o turismo, transmitir o coñecemento do sector horticultor e conectar ás persoas maiores ao mundo dixital.
Tamén recibiron apoio económico do Executivo autonómico os proxectos de voluntariado interxeracional dos Concellos de Cenlle, para sensibilizar sobre a importancia de conservar as tradicións; e o de Mos, que incluíu faladoiros, musicoterapia e ensinanza de instrumentos tradicionais.