O portavoz do PP, Miguel Gallego, advirte do malestar entre os maiores da residencia municipal de Samos porque “a pesar de que chegou o frío, o señor Préstamo -concelleiro de Cultura e Deportes- négase a acender a calefacción alegando que hai que aforrar cartos, segundo nos trasladan os usuarios e usuarias”.
O popular explica que “os maiores se lamentan de ter que estar con chaquetas e mantas todo o día para soportar a baixada de temperaturas, especialmente nas habitacións; xa que moitos son moi maiores e teñen distintas patoloxías e deberían estar nun ambiente cálido”. Os usuarios e usuarias deste centro de titularidade municipal esixen este servizo tendo en conta que “pagan todos os meses o estipulado”.
O portavoz do PP non entende “en que se están investindo os cartos que sacan continuamente do remanente se non se prestan nin os servizos básicos aos maiores”.
Así mesmo, pregúntanse se estas son as melloras que tiña previsto o BNG para o centro de maiores: “traballar na horta de forma altruísta e non acender a calefacción porque gasta”.
Gallego asegura que “ata agora o único que levamos visto deste goberno bipartito son fotos e publicidade enganosa porque o que é traballar e prestar servizos: nada de nada”.