Esta mañá abriuse o prazo para a presentación de solicitudes para participar como figurante, con 235 prazas dispoñibles
A Cabalgata de Reis deste nadal, prevista para as 18.00 horas do días 5 de xaneiro, contará con 14 carrozas, 5 trens e 17 compañías artísticas e de animación no seu percorrido. A comitiva sairá do Barrio das Flores, fronte do CEIP Ramón de la Sagra, e rematará como cada ano na praza de María Pita co saúdo das súas maxestades, en torno ás 21.15, a todos os nenos e nenas presentes na praza.
Das 14 carrozas que participarán no percorrido, oito serán municipais e cinco procedentes de patrocinadores que un ano máis volven sumarse a esta cita tan especial para os nenos e nenas da Coruña. Sumaranse a elas a carroza dos bombeiros da Coruña, a máis esperada polo público infantil e que pechará a comitiva repartindo caramelos.
Entre os grupos de animación que estarán na Cabalgata, destaca a participación da Asociación ENKI. Ademais, este ano, o goberno de Inés Rey volverá poñer a disposición dos coruñeses e coruñesas catro puntos accesibles e dous sen ruido. Os puntos accesibles estarán localizados na rúa alcalde Pérez Ardá, fronte á estación de autobuses; na praza de Ourense na zona do Quiosco; na parada do autobús no número 21 da Mariña, fronte á subdelegación do Goberno; e na praza de María Pita, na zona lateral próxima á rúa Troncoso. Nestes catro puntos estarán ademais situados catro puntos de atención sanitaria e Primeiros Auxilios da man de Cruz Vermella. Os dous puntos sen ruido estarán situados no cruzamento ente as rúas rolda de Outeiro e alcalde Pérez Ardá así como no teatro Colón, no interior do equipamento.
En total, na montaxe e coordinación da Cabalgata de Reis participarán un total de 231 persoas, así como persoal de seguridade. O Concello da Coruña tamén pon a disposición un total de 235 prazas de figurantes para nenos e nenas de entre 7 e 11 anos. O prazo de solicitude comezou esta mañá e finalizará o mércores 20 ás 14.00 horas. As persoas interesadas e os seus titores legais poderán formalizar a súa inscrición a través do formulario que se habilitará na páxina web municipal www.coruna.gal. O 28 de decembro publicarase a listaxe definitiva de solicitudes.