O Ineltrón Santo Domingo sofre máis do necesario para vencer ao Rosalía

por Redacción Deportes

Vale que ninguén contase cun partido fácil, máxime coa baixa no xogo interior de Pepe Moreno, pero había tempo que non se vía un partido tan complicado como o que seu viu a tarde do domingo no Carregal. O Rosalía, clasificado finalmente por basket average para o grupo polo título, chegou a Betanzos sen a presión polo resultado e foi polo partido dende o inicio, como ben demostra o 0-8 do arranque.

Alicerzados nun efectivo tiro de tres (10/18, un 55%) os de Santiago non deron tregua a un Santo Domingo, pouco acertado nesa faceta (4/14, un 28%) e na defensa dese tiro exterior, que só xogou aos tropezóns. Se a reacción perante ao parcial inicial parecía levar as cousas ao seu lugar (18-17 no 1Q, 37-33 ao descanso) un calamitoso terceiro cuarto, do peor que se viu no Carregal nos últimos tempos, arrincou os primeiros apupos da bancada nesta temporada: 0-18 de parcial para os santiagueses, só mitigado nos últimos minutos por unha lixeira reacción (8-24).

Así as cousas, con anoxo incluído de Doc, que mudou dunha vez os 5 xogadores que tiña en pista, poucos pensaban que o signo do encontro puidese cambiar. Cun 43-57 a falta de pouco máis de 1 minuto para o remate dese fatídico cuarto, os de Betanzos puxéronse a defender o que non defenderan no que ía de partido, e cun parcial de 24-04 sumaron unha vitoria coa que ninguén contaba minutos antes. Providencial o empuxe de Latas, que volveu facer un extraordinario partido, providencial tamén os últimos minutos de Abelleira, e providencias como non, os veteranos, Will e Rozas, o último sumando unha tripla decisiva nos últimos segundos. Defendéronse mal as triplas, falláronse unha chea de tiros libres, acertouse pouco no xogo exterior e no rebote en ataque, pero, ao fin e a cabo, a vitoria quedou na casa e o Ineltrón Santo Domingo Betanzos acaba a 1º Fase con 12 vitorias en 12 partidos.

O difícil -e era de esperar- comeza agora.

Ineltrón Santo Domingo Betanzos 67: Will Pereiro 9, Abelleira 11, Sanjurjo 1, Dani Cayado, Jorge Cayado, Dani Martín 2, Luis Portilla 6, Cardalda 2, Latas 15, Ernest 5, Brezo.
Rosalía de Castro 61: Luis García Ortiz 8, Sergio Valdés 15, Carlos Valdés 5, Álvaro Foira 7, Valenzuela 6, Javi Prieto 15, Andrés Blanco, Josué Mújica, Campuzano 5.

Etiquetas
Comparte éste artículo
1 Comment