A senadora do BNG, Carme da Silva, rexistra novas iniciativas na cámara alta solicitando ao Ministerio de Traballo que afonde nas causas da alta sinistralidade laboral na Galiza e desenvolva todas as medidas precisas para reducir esta cifra. Da Silva propón actualizar a Lei de Prevención de Riscos Laborais, aprobada en 1995, e desenvolver o Plan de Choque de 2019 para que «ningunha persoa perda a vida por mor do seu traballo», en colaboración coa Xunta de Galiza. Así mesmo, recorda a necesidade de aumentar o persoal de inspección de traballo -necesarias para combater a precariedade laboral e garantir a prevención e a seguridade-, así como a transferencia das competencias á Galiza.
Os datos de sinistralidade laboral na Galiza son, segundo describe a senadora do BNG, alarmantes. «No que vai de ano producíronse 13 mortes na Galiza. A sinistralidade laboral subiu 7,11% de 2022 a 2023, sendo na Comunidade onde máis creceu» subliña. Por sectores de actividade, a construción é o sector con maior índice, seguido da industria e da pesca.
Ante esta situación, a senadora do BNG demanda ao Ministerio de Traballo novas actuacións para frear e combater a elevada sinistralidade laboral da Galiza. «Queremos coñecer tanto a avaliación que realizada o Ministerio destes datos como as medidas que ten previsto levar a cabo» explica Carme da Silva.
Paralelamente, a nivel lexislativo lembra que a Lei de Prevención de Riscos Laborais data do ano 1995 e anima ao Ministerio a levar a cabo unha actualización da mesma. «Durante estas décadas produciuse unha evolución no mercado de traballo, con nos situacións e cambios no mundo laboral que deben ser contemplados. O Goberno debe adaptar o texto ás novas realidades» especifica a senadora do BNG.
«Na pasada lexislatura o Ministerio de Traballo aprobou un Plan de Choque contra os accidentes mortais no traballo ante as elevadas cifras de 2019. O obxectivo era que ningunha persoa perdese a súa vida por mor do traballo, en liña co estabelecido pola Comisión Europea para reducir a sinistralidade laboral mortal» lembra. Neste sentido, da Silva pide información ao Ministerio para coñecer as actuacións que levou a cabo, en colaboración coa Xunta de Galiza, e o balance que fai o Ministerio sobre a aplicación dese Plan de Choque.
Aumentar a prevención e a inspección. Transferir á Galiza as competencias
Outra das demandas do BNG, lembra a senadora nacionalista, é a necesidade de reforzar a Inspección de Traballo co obxectivo de garantir o cumprimento das medidas en materia de seguranza. «Aumentar o persoal de inspectores de trabalo na Galiza aparece recollido nunha moción aprobada nesta cámara na Comisión de Traballo que, alén de solicitar que se cumpran as ratios de profesionais, solicitaba o posicionamento da cámara alta para que o Ministerio iniciase a transferencia á Galiza en materia de xestión de Inspección do Traballo» afirma Carme da Silva.
«A precariedade laboral con ritmos de traballo centrados na hiperprodución, con extenuantes xornadas laborais, a redución dos tempos de descanso, a falta de formación en prevención, a relaxación das medidas de seguridade e a falta de inspectores de traballo nun número suficiente, son factores que inciden no aumento da sinistralidade laboral» sinala.