A Deputación da Coruña insta á Xunta de Galicia a que estableza un plan de axudas e compensacións ás mariscadoras e mariscadores do Burgo ata que a ría recupere a súa capacidade produtiva e, polo tanto, permita traballar na zona. Ademais, a institución provincial solicita ao goberno autonómico que estableza un protocolo de seguimento e supervivencia da sementa realizada para monitorizar a rexeneración neses bancos marisqueiros.
A moción presentada por PSOE e BNG foi finalmente en dous puntos á hora de realizar a votación por petición do grupo popular. O primeiro deles, relativo ao protocolo de seguimentos para monitorizar a rexeneración, foi aprobado por unanimidade. O segundo, referido ao plan de axudas e compensacións ás mariscadoras e mariscadores, obtivo luz verde con 16 votos a favor de PSOE, BNG e Alternativa dos Veciños e 14 votos en contra do PP.
O texto lembra que no ano 2021, o Ministerio para la Transición Ecológica y el Reto Demográfico licitou o proxecto de dragado ambiental dos sedimentos da ría do Burgo. Despois de máis de dous anos de traballos e un investimento superior aos 33 millóns de euros, dito proxecto foi concluído o pasado 26 de abril. «Durante o tempo de duración das obras, o Goberno Central foi o único que se fixo cargo de abonar axudas por inactividade ós e ás mariscadoras do Burgo. Foi unha actuación imprescindible e necesaria, por unha contía total de 3.659.120,22 euros», afirmou o deputado José Ramón Rioboo, encargado de defender a moción.
Rioboo que «a Xunta de Galicia ten competencias exclusivas en marisqueo» e, polo tanto, «unha vez rematadas as obras debe comezar a traballar para dar solucións a mariscadores e mariscadoras do Burgo, que reclaman compensacións económicas xustas unha vez finalizado o dragado, ata que os bancos recuperen a súa produción e poidan volver a traballar na zona». O voceiro do goberno provincial mostrouse ademáis convencido da «disposición a colaborar do Goberno de España».
A maiores desta esixencia para cubrir as necesidades do sector ante a inactividade, a moción explica que o dragado realizado, que afectou á Coruña, Cambre, Culleredo e Oleiros, incluía a sementa. Dita sementa contou co visto bo dos biólogos da Xunta de Galicia, pero «agora é necesario que a Xunta estableza os protocolos de seguimento e control do proceso de desenvolvemento e supervivencia da semente implantada». O obxectivo desta monitorización é asegurar «unha recuperación efectiva» dos bancos marisqueiros para a súa explotación e, deste xeito, «completar a rexeneración integral, tanto ambiental como socio-económica, da ría».