Máis de 1.400 persoas maiores volveron encher os xardíns das Torres de Santa Cruz de alegría, reencontros e bos momentos. A XXVIII Romaría das Merendiñas non defraudou e as máis de 100 persoas colaboradoras, encargadas de elaborar a comida e servila nas mesas, funcionaron como auténticos profesionais, baixo a coordinación do equipo de Servizos Sociais e Igualdade.
A favorable climatoloxía contribuíu a redondear unha xornada marabillosa na que a boa música propiciou o baile, antes e despois do xantar, coa Banda Municipal, o dúo Xilo e Carlos e os solistas Melchor e Marietta.
A gran capacidade de convocatoria que ten esta xa tradicional romaría denota ata que punto a xente maior de Oleiros participa nas actividades para manter unha vida social máis activa e estimulante.
O Concello de Oleiros quere agradecer publicamente a todas as persoas voluntarias o seu traballo no día de hoxe. A Romaría das Merendiñas non tería sido posible sen as preto de 100 persoas que colaboraron co Concello durante toda a xornada. A boa organización e a excelente predisposición das persoas voluntarias e dos traballadores e traballadoras municipais fixo posible servir a comida nun tempo récord e lograr que todo funcionase correctamente.