Na xornada de hoxe, 24 de xuño, cun importante incremento das temperaturas de xeito xeral en toda Galicia e un grande número de desprazamentos por ser festivo en moitos concellos, o Consorcio Provincial de Extinción de Incendios e Salvamento de A Coruña, que ten a obriga de prestar a atención nesta materia de emerxencias ao ámbito provincial fora das grandes vilas, está a incumprir a súas obrigas coa cidadanía, conforme esixe a Lei de Bases de Réxime Local.
Os parques Comarcais de Ribeira, Ordes, Costa da Morte e Eume (4 dos 10 parques que dependen do Consorcio coruñés) botaron o peche a primeira hora do día non restablecendo o seu servizo, como moi pronto, ata mañá día 25 de xuño.
Na provincia de Ourense hoxe abre o parque de O Carballiño, que atende a máis de 20 concellos, con unicamente dous efectivos, sendo esta a terceira xornada consecutiva na que isto acontece.
De non atoparse solucións a curto prazo, o verán, igual que o resto do ano, virá acompañado de episodios constantes de peches de parques de bombeiros en toda Galicia, debido a falta de persoal é a negativa dos traballadores a realizar horas extraordinarias mentres non sexan palpables as melloras de condicións, xa que a día de hoxe nada cambiou respecto das condicións que iniciaron o conflito en maio de 2023.
Os bombeiros, que a pesares de levantar a folga non desisten das súas demandas, temen sentirse enganados ante o feito de que se achegan os prazos nos que as administracións se comprometeran a ter resoltos certos aspectos sen existir ningún avance palpable.
Os representantes dos traballadores chaman á calma e seguen confiando en que as negociacións que están abertas coa administración arroxen solucións á escaseza de persoal, á adecuación retributiva e á falta de material. Sindicatos e Administracións continúan un proceso negociador desde que ás portas das eleccións autonómicas os traballadores levantaran a folga indefinida que mantiñan para esixir unhas melloras que a día de hoxe aínda están sen atender.