Foron recibidos polo deputado Antonio Leira, que destacou a contribución do centro escolar á promoción da cultura galega en Arxentina.
O deputado Antonio Leira recibiu esta mañá no salón de plenos da Deputación a unha delegación de alumnos do instituto arxentino-galego Santiago Apóstol, da cidade de Bos Aires.
Os escolares, que cursan os últimos anos de Secundaria, realizan estes días a súa viaxe de fin de estudos. Durante os quince días de estancia, os mozos e mozas terán a oportunidade de descubrir múltiples lugares da xeografía coruñesa e galega.
Leira deu a benvida aos estudantes, aos que explicou o funcionamento da Deputación, e destacou a importante contribución do centro escolar á promoción da cultura e a lingua galega na capital arxentina, xa que os centos de alumnos de diversas nacionalidades que se forman no colexio teñen entre as súas materias escolares a lingua e a historia de Galicia e moitos deles teñen raíces familiares na nosa terra.
O instituto galego-arxentino Santiago Apóstol foi inaugurado en 1998 co obxectivo de desenvolver un programa educativo bicultural neste país.
O alumnado do centro cursa nel materias coma lingua e literatura galegas e xeografía e historia de Galicia, contribuíndo así a manter a identidade e a cultura galega entre os estudantes.