O concerto de Marwán, xunto a unha experiencia gastronómica a cargo do chef Rafa Centeno, puxeron este sábado o peche ao ciclo ‘Momentos Alhambra Acustiquísimos 2024’, que contou co patrocinio da Xunta de Galicia. O delegado territorial, Javier Arias, asistiu ao evento, que encheu este sábado o Círculo das Artes da capital.
O proxecto Acustiquísimos caracterizouse por presentar música en acústico en espazos singulares da nosa comunidade acompañada de propostas gastronómicas. Comezou a súa andaina o 16 de novembro coa actuación de Carlos Sadness en Vigo, ao que seguiron os concertos de María José Llergo na Coruña, Muchachito Bombo Infierno en Santiago de Compostela e o de Marwán, hoxe en Lugo.
Marwán é un dos referentes actuais da música de autor do noso país e está de xira co seu disco ’20 Aniversario’, no que reinterpreta os temas do seu traballo ‘El viejo boxeador’. O apunte gastronómico no Círculo das Artes de Lugo puxérono as tapas do chef Rafa Centeno, do restaurante Vértigo.
