Realizouse unha pequena reforma que permitirá dispoñer dunha nova área de traballo aos centros interuniversitarios nos que participa a UDC
A planta -4 do Edificio de Servizos Centrais de Investigación da Universidade da Coruña conta desde estes días cun novo espazo remodelado, concibido para albergar aos centros interuniversitarios nos que participa a UDC. Esta reforma realizouse no atrio central da planta e en dúas salas que ata ese momento atopábanse en desuso. A formulación do proxecto foi a creación dun lugar de traballo híbrido e flexible, no que convivisen zonas de traballo individual e en grupo, áreas de descanso e ocio, e un espazo pensado como salón de actos.
O núcleo central da intervención foi o atrio do andar -4 do edificio, no que se dispuxo o salón de actos, diversas áreas de traballo individual e espazos de soft seating. Ademais, habilitáronse tres salas de usos múltiples, que serven para celebrar reunións, videoconferencias ou tamén como zonas de traballo individual.
O mobiliario seleccionado foi un dos elementos clave da intervención, posto que contribúe a crear espazo aberto e híbrido, favorecendo o benestar das persoas usuarias e onde coexisten diversos usos, todo isto atendendo a criterios de sustentabilidade e utilizando materiais que optimizan os recursos naturais.
Tras esta remodelación, a UDC conta, no Campus de Elviña, cunha nova área co obxectivo de facilitar a integración de equipos multidisciplinares e multi-institucionais, optimizando os recursos dispoñibles e favorecendo a colaboración e a interacción entre as persoas que integran os diferentes equipos de traballo.
En resumo, o novo espazo do ESCI pretende ser un lugar moderno, funcional, e de uso compartido, que pretende favorecer a interacción e colaboración entre o persoal investigador da institución.
Reunión co persoal da UDC
O reitor da UDC, Ricardo Cao, e o vicerreitor de Investigación e Transferencia, Jerónimo Puertas, presentaron este novo espazo á comunidade, nunha reunión celebrada o luns con persoal laboral contratado con cargo a proxectos, axudas, e convenios de investigación e transferencia de coñecemento.
Esta xuntanza súmase ás máis de 20 que o reitor da UDC está a celebrar nos centros co persoal da Universidade para escoitar as súas demandas e achegas.
