A deputada de Educación clausura os cursos da UNED Senior na Coruña.
A deputada de Educación e Mocidade da Deputación da Coruña, Yoya Neira, participou hoxe no centro asociado da UNED na Coruña no acto de clausura e entrega de diplomas aos participantes nos cursos da UNED Senior, dirixidos a maiores de 55 anos.
Os cursos contaron cunha programación ampla e diversa, que permite aos maiores continuar e enriquecer a súa formación en distintos ámbitos, desde as ciencias ás artes, independentemente da formación académica previa que posúan.
O programa UNED Senior enmárcase na programación cultural da institución académica que impulsa a Deputación da Coruña a través dun convenio e que este ano permitiu programar un total de 85 actividades, conferencias e cursos nos que participaron 8.421 persoas de todas as idades e que abranguen disciplinas tan diversas coma o Dereito, a investigación social, a literatura e a historia, as ciencias da saúde ou as novas tecnoloxías.
