O pasado Nadal a central de coordinación do 061 de Galicia recibiu 31.942 chamadas de demanda sanitaria, que xeraron 25.640 procesos asistenciais
A Fundación Pública Urxencias Sanitarias de Galicia-061 reforza, un ano máis, o seu persoal da central de coordinación para garantir que a asistencia sanitaria ás urxencias e ás emerxencias, durante as datas de Nadal, sexa axeitada en toda a comunidade autónoma.
Así, a central de coordinación do 061 amplía o servizo habitual segundo as análises de incremento de chamadas nestas festas. Búscase axilizar a consulta médica e optimizar a xestión dos recursos co fin de dispoñer dos medios máis axeitados para a atención das emerxencias que puideran xurdir.
Isto supón que estes vindeiros días haberá un facultativo máis nas quendas de noite (de 22 a 8 horas) as noites do 24 e 31 de decembro e 5 de xaneiro, así como nas quendas de mañá e tarde dos días 24, 25 e 31 de decembro e dos días 1, 5, 6, 7 e 8 de xaneiro. Respecto ao persoal de xestión telefónica, o servizo reforzarase cun teleoperador máis na quenda da noite do 24 de decembro e cun máis na noite do 31 de decembro.
Nadal 2023-2024
O pasado Nadal, concretamente desde o 24 de decembro de 2023 ata o 6 de xaneiro de 2024, a central de coordinación do 061 recibiu un total de 31.942 chamadas de demanda sanitaria, que xeraron 25.640 procesos asistenciais.
Dos 25.640 procesos asistenciais xerados, o 39 % resolveuse sen mobilización de recursos e o 61 % restante precisou da mobilización dalgún recurso (visita domiciliaria de persoal médico ou de enfermaría de atención primaria, transporte urxente e/ou emerxencias).
Dos procesos asistenciais nos que a central de coordinación estimou necesaria a mobilización dalgún recurso, nun 57 % tratouse de emerxencias sanitarias e no 43 % de transporte urxente. En total mobilizáronse 15.254 recursos.
Neste período os principais motivos de demanda sanitaria do 061 foron alteración de consciencia, dor torácica, problemas respiratorios e accidentes de tráfico.
En relación cos accidentes de tráfico, neste período foron atendidas 330 chamadas que xeraron 257 asistencias sanitarias. Por eses avisos foron atendidas 338 persoas, das cales sete faleceron no punto do incidente.
No caso das intoxicacións, entre o 24 de decembro de 2023 e o 6 de xaneiro de 2024, os profesionais do 061 atenderon 420 persoas, das que 362 foron asistidas por intoxicacións de alcohol e 58 por consumo de drogas.
