Do 21 ao 23 de febreiro na asturiana estación invernal Fuentes de Invierno
O Concello da Laracha organiza unha nova edición do programa Finde na neve co propósito de iniciar na práctica do esquí a mozos de entre 12 e 18 anos de idade.
Farase do venres 21 ao domingo 23 de febreiro nas instalacións da estación invernal Fuentes de Invierno localizada no asturiano municipio de Aller.
A cota que deberán aboar os participantes que obteñan a praza é de 150 euros. Inclúe o transporte en autobús, a estancia con pensión completa nun hotel de tres estrelas, aluguer de material (esquís, botas, bastón e casco), curso de esquí e seguro de viaxe.
O prazo de preinscrición abrirase o luns (27 de xaneiro) e pecharase o 6 de febreiro. Pódese realizar o trámite en liña cubrindo o formulario que estará dispoñible na web municipal www.alaracha.gal ou ben acudindo á Casa do Concello. No caso de que se presenten máis solicitudes de participación que prazas dispoñibles, para outorgalas realizaríase un sorteo público o 7 de febreiro ás 10:00 horas no Salón de Plenos do Concello. Terán prioridade aqueles rapaces que non participaran nesta mesma iniciativa no ano pasado.
