A deputada socialista Patricia Iglesias denuncia que o Goberno galego deixa sen executar millóns de euros e que as provincias de Lugo e Ourense non recibiron nin un só euro do Fondo de Compensación Interterritorial (FCI) en 2022 e 2023.
A crítica do PSdeG chega despois de que o Consello de Contas confirmase a nefasta xestión destes fondos por parte da Xunta. «O PP leva anos xestionando mal e excluíndo a Galicia interior de calquera planificación seria», afirmou Iglesias.
Un fondo sen rumbo e sen xustiza
Segundo a deputada, o informe do Consello de Contas revela que en 2022 Galicia recibiu 102,5 millóns de euros, pero a Xunta comprometeu só 50,4 millóns e executou menos da metade desa cantidade.
«O FCI non só se executa mal, senón que se emprega sen criterios coñecidos nin transparencia», explicou Iglesias. A deputada engadiu que o feito de que Lugo e Ourense non recibisen financiamento «xa non é un erro, é unha forma de gobernar».
O informe de Contas tamén sinala que o Goberno de Rueda non ten un rexistro contable específico nin mecanismos para que os municipios poidan participar.
As propostas do PSdeG
O PSdeG esixe á Xunta que poña en marcha un rexistro contable transparente, que estableza criterios públicos e equitativos de reparto e que reinvista os máis de 50 millóns de euros sen executar nos últimos exercicios.
«Galicia necesita un goberno que xestione, non que desapareza cando toca investir. Porque cando a Xunta falla, quen o paga son os concellos e a xente», concluíu Iglesias.
