A eurodeputada do BNG, Ana Miranda, tamén criticou as consecuencias do acordo co Mercosur no sector agrario galego
No debate do pleno do Parlamento Europeo “Desafíos aos que se enfrontan os agricultores e os traballadores agrícolas da Unión: mellora das súas condicións laborais, en particular do seu benestar mental”, Ana Miranda denunciou as negativas consecuencias que terá a instalación da macrocelulosa Altri en Palas de Rei sobre o sector agrario e gandeiro galego.
“Como eurodeputada galega sei que o traballo na terra é canso, duro e perigoso. Falamos hoxe do benestar dos agricultores. O que hai é malestar”, manifestou Miranda ao inicio da súa intervención na Eurocámara. “No meu país queren instalar unha macrocelulosa contaminante que vai ocupar os terreos produtivos agrarios máis fértiles do noso país, e que vai requirir aínda máis plantacións de eucalipto, consumindo moita auga. Iso si que provoca malestar. O malestar de 100.000 persoas que saíron as rúas para dicir Altri Non”, subliñou.
Entre as consecuencias negativas da macrocelulosa que o PP quere instalar en Palas de Rei destaca a utilización da auga por parte de Altri tanto do río Ulla como do encoro de Portodemouros, así como a afectación dunha zona rica en biodiversidade como é a Rede Natura (ZEC Serra del Careón, ZEC Sistema Fluvial Ulla-Deza e ZEC Sobreirais del Arnego.
Ademais, Altri prevé que a súa planta consuma 1,2 millóns de toneladas de eucalipto ao ano, co risco que supón de aumento de incendios, e 46 millóns de litros de auga ao día do encoro de Portodemouros. Deste total de auga prevé verter 30 millóns de litros contaminados ao río Ulla, a unha temperatura de entre 27º e 29º, que por outro lado afectaría tanto á flora e fauna da zona, como a zonas pesqueiras e marisqueiras da ría de Arousa.
Produtores discriminados
“Hai anos que desde o meu país, a Galiza, queixámonos das malas condicións de traballo, da baixada dos prezos, das vendas por debaixo do custo de produción e de que moitos terratenentes reciben en Europea axudas sen traballar e os agricultores pequenos, os produtores de leite e de carne son discriminados”, manifestou a eurodeputada do Bloque.
“A estas incertezas sobre o futuro da súa fonte de ingresos temos que sumar un acordo co Mercosur que ameaza o sector, ao ter que competir en condicións desiguais con produtos máis baratos e producidos, en moitos casos, con pesticidas prohibidos en Europa”, denunciou.
