O Partido Popular de Lugo rexeita as críticas do PSOE sobre un suposto agravio territorial e subliña que a provincia lidera o investimento por habitante da Xunta de Galicia dende 2020. Os populares aseguran que o investimento en Lugo ascende a 5.840 euros por habitante, superando a media galega de 4.717 euros.
Os populares reprochan ao PSOE que tivese que «buscar nun fondo de 40M€» dentro duns orzamentos de 14.000M€ para lanzar unha acusación que, segundo eles, carece de fundamento.
Grandes proxectos e crítica á xestión socialista
O PP destaca que o Goberno galego financia con fondos propios importantes proxectos na provincia:
- 1,6M€ para a intervención no Anxo Carro.
- 6,2M€ para a estación intermodal de Lugo.
- 5,6M€ para o plan director do Hospital da Mariña.
- 2,2M€ para actuacións no Hospital de Monforte.
- Máis de 6M€ en diversas actuacións viarias.
Ademais, os populares acusan ao PSOE de mentir sobre o Fondo de Compensación Interterritorial, asegurando que os fondos non se perden e se poden incorporar ao ano seguinte se as obras se atrasan. Lémbranlle ao PSOE que foi o goberno de Zapatero o que recortou este fondo a Galicia nun 60%, pasando de 203M€ a 77M€, unha situación da que a comunidade aínda non se recuperou.
Sen avances nos servizos ferroviarios
O PP lucense tamén critica a falta de melloras nos servizos ferroviarios. Aseguran que as declaracións da portavoz municipal socialista non concretaron ningunha mellora nas frecuencias e lembran que o PSOE, coa complicidade do BNG, permitiu que o goberno de Sánchez deixase a Lugo fóra da alta velocidade.
