O Partido Popular de Lugo presentou unha iniciativa no Congreso para pedir explicacións ao Goberno de Pedro Sánchez sobre o «colapso» de Correos durante o verán. Segundo os populares, a empresa pública non está a contratar persoal suficiente para cubrir as baixas por vacacións, o que provoca un «deterioro da prestación do servizo» e unha «carga de traballo inasumible» para os carteiros.
Os deputados por Lugo Jaime De Olano, Francisco Conde e Cristina Abades, xunto co ourensán Celso Delgado, diríxenlle formalmente ao Goberno unha serie de preguntas por escrito. Queren saber que medidas pensa adoptar Correos para solucionar os atrasos e se se vai contratar persoal para reforzar o servizo.
Atrasos e situación crítica en comarcas como A Mariña
O PP denuncia que se están a rexistrar atrasos de máis dunha semana na entrega de correspondencia. Esta situación é especialmente grave en zonas como A Mariña, onde a poboación case se triplica no verán, agravando a falta de medios.
Jaime De Olano critica duramente a «incompetencia do Executivo estatal», afirmando que «con Sánchez os españois pagamos máis impostos que nunca, pero temos peores servizos ca nunca e unhas condicións laborais máis precarias». A formación lamenta que os cidadáns paguen as consecuencias da «política de contratación cero» de Correos, que está a provocar un «colapso xeneralizado» e unha imaxe pública moi deteriorada da empresa.
