A Deputación de Lugo apoia a XVIII Festa da Gaita de Quintá, que se celebra este fin de semana en Becerreá, cunha achega de 6.000 euros. A cita, que terá lugar os días 16 e 17 de agosto na parroquia de Quintá de Cancelada, espera reunir preto dun milleiro de persoas.
A deputada de Réxime Interior, Promoción do Territorio e Turismo, Pilar García Porto, presentou hoxe o evento e subliñou o seu valor como «un clásico da montaña lucense» que demostra a vitalidade do rural. «O noso rural está cheo de ideas, de talento e de iniciativas. Pero para que saian adiante, as Administracións públicas temos que poñer da nosa parte», afirmou.
A festa, organizada pola Asociación Cultural e Deportiva Chao de Sebes, xuntará a músicos tradicionais, gaiteiros e acordeonistas, e ofrecerá a degustación de produtos locais. O programa arranca o sábado ás 13:00 h coa recepción dos participantes.
