O Concello das Neves nomeou hoxe a Míchel Salgado como Fillo Predilecto do municipio. A distinción, aprobada no pleno municipal, recoñece a súa brillante traxectoria deportiva e a súa calidade humana. Ademais deste nomeamento, o Concello anunciou outras iniciativas para homenaxear ao ex-futbolista:
- O Complexo Deportivo da Caíña pasará a chamarse “Complexo Deportivo Míchel Salgado”. Este cambio de nome vincula permanentemente a figura do deportista coa promoción do deporte local.
- Creación dunha Escola de Fútbol Base Míchel Salgado. Aproveitando a experiencia de Salgado en categorías inferiores, esta nova escola centrarase na formación de novos talentos no municipio.
O nomeamento de Fillo Predilecto, promovido polo grupo de goberno, foi aprobado co voto a favor do PP e a abstención do resto dos grupos. O alcalde, José Manuel Alfonso, destacou que “con este nomeamento dáse un importante paso adiante para poñer en valor a un dos mellores deportistas da nosa historia, que sempre destacou polo seu sacrificio, traballo e entrega e por ter levado o nome desta vila por todo o mundo. Ese exemplo, de éxitos e de compromiso coa práctica do deporte, é o que queremos promocionar para as novas xeracións de rapaces e rapazas, porque por sorte teñen un gran espello onde verse reflectidos”.
A cerimonia de entrega do diploma e a insignia de Fillo Predilecto terá lugar mañá, nunha sesión solemne no salón de plenos do Concello.
Míchel Salgado, unha traxectoria de éxito global
Nacido nas Neves, Míchel Salgado é unha das figuras máis destacadas do fútbol español. Xogou en equipos de elite como o Celta de Vigo e o Real Madrid, onde conseguiu numerosos títulos, ademais de ser un habitual na Selección Española.
Actualmente, Salgado está involucrado en proxectos de emprendemento deportivo en Asia, onde é o máximo responsable do club Fursan Hispania nos Emiratos Árabes Unidos. O seu club, fundado en 2020, conta con técnicos galegos e estase expandindo coa creación de categorías inferiores e un equipo feminino.
