Un proxecto do CITEEC busca revolucionar a enxeñaría estrutural optimizando o deseño de pontes, edificios, avións e implantes biomédicos.
O Centro de Innovación Tecnolóxica en Edificación e Enxeñaría Civil (CITEEC) da Universidade da Coruña está a liderar un innovador proxecto de investigación que busca crear estruturas máis resistentes, eficientes e respectuosas co medio ambiente. A través da optimización topolóxica, unha rama avanzada da enxeñaría estrutural, o equipo busca deseñar pezas máis lixeiras, seguras e económicas.
O proxecto, denominado “Optimización topolóxica de estruturas con restricións avanzadas”, é unha das sete propostas do CITEEC aprobadas na convocatoria de Proxectos de Xeración de Coñecemento 2023. A investigación, liderada por Fermín Navarrina e José París, busca desenvolver modelos que incorporen factores que ata agora non se consideraban nos deseños convencionais.
Superando os límites da enxeñaría actual
O estudo céntrase en tres fenómenos clave que afectan á seguridade das estruturas:
- Pandeo: Un fenómeno que provoca deformacións e roturas repentinas en estruturas delgadas.
- Efectos non lineais: Comportamentos complexos que xeran deformacións ou cambios de forma non proporcionais á carga que reciben.
- Efectos dinámicos: Vibracións perigosas causadas por accións externas como o vento, a ondada ou os terremotos.
Ao integrar estes factores nos seus modelos, os investigadores conseguen ampliar o rango de aplicación dos seus deseños a múltiples eidos, como a enxeñaría civil, aeronáutica e ata a biomédica, por exemplo, na creación de implantes.
O proxecto comezou en setembro de 2024 e estenderase ata finais de 2026. Nel colabora persoal investigador de España, Portugal e Francia, con apoio de expertos dos Estados Unidos e Dinamarca. A mesma convocatoria de 2023 aprobou un total de sete proxectos vinculados ao CITEEC, cunha financiación total de 1.143.875 euros.
