O Consorcio Provincial de Bombeiros de Lugo reforzou a súa colaboración coa Xunta de Galicia na loita contra os lumes que asolan Ourense. O presidente da Deputación de Lugo e do Consorcio, José Tomé Roca, informou hoxe da mobilización dun novo operativo, o que supón un esforzo diario desde principios de semana.
Segundo Tomé, este sábado despregáronse tres bombas nodrizas pesadas, catro vehículos de mando e trece efectivos. Un sarxento do Consorcio encargarase de coordinar o dispositivo desde Monforte de Lemos e actuará como enlace co Centro de Coordinación Provincial (Cecopi) da Xunta.
O presidente da Deputación asegurou que o Consorcio está á disposición do Cecopi e que a vontade é «colaborar, achegando medios e persoal para combater o lume onde máis falta fai».
Solidariedade e seguridade para Lugo
José Tomé sinalou que, desde o martes, se mobilizaron efectivos e vehículos desde os parques de Monforte, Chantada, Vilalba, Viveiro, Barreiros e Sarria. O venres, por exemplo, xa estiveron traballando na zona afectada tres bombas nodrizas e once bombeiros.
O presidente provincial tamén quixo mostrar a solidariedade de Lugo coa veciñanza de Ourense e recoñeceu o «esforzo titánico» dos bombeiros, brigadistas, a UME, as forzas de seguridade, os voluntarios e os propios veciños. Ademais, reclamou unha investigación a fondo para atopar e castigar a quen estea detrás desta «traxedia», que cualificou de «acto criminal».
Para rematar, Tomé Roca lanzou unha mensaxe de tranquilidade á provincia de Lugo: «Estamos a enviar medios para apoiar onde máis falta fan, pero facémolo asegurando que os parques da provincia sigan contando con persoal operativo para atender calquera emerxencia».
