O sindicato denuncia que a Consellería de Medio Rural confirma as súas advertencias sobre a falta de persoal e a in– Comisións Obreiras (CCOO) denunciou hoxe que a Consellería de Medio Rural confirma a falta de persoal no operativo de extinción de incendios ao convocar onte, en pleno mes de agosto, un total de 117 prazas vacantes. A convocatoria urxente inclúe postos de emisorista-vixilante, bombeiro forestal e condutor de motobomba.
Para CCOO, esta acción demostra a «inxustificable» falta de previsión da Xunta, que ignorou as denuncias do sindicato sobre a non cobertura de prazas e a non substitución de baixas desde febreiro. En Ourense, a situación é especialmente crítica, con 25 vacantes sen cubrir, o que afecta a brigadas, motobombas e puntos de vixilancia.
Óscar Rodríguez González, delegado de CCOO, subliñou que esta carencia de persoal prexudica a eficacia do operativo e incrementa os riscos para os profesionais. «É inaceptable que, en plena vaga de lumes, Medio Rural non teña cubertas todas as prazas do SPIF», afirmou.
O sindicato reitera a súa esixencia de que se cubran de inmediato o 100% dos postos vacantes e denuncia as condicións «ás veces extremas» nas que os profesionais teñen que traballar debido á falta de persoal e medios. CCOO insiste en que estes problemas estruturais teñen un impacto directo na calidade do servizo.
Foto Cuatro TV
