O Partido Popular de Galicia (PPdeG) impulsa unha «ofensiva parlamentaria» no Congreso e no Senado para que as sete grandes cidades galegas conten con xulgados específicos de violencia de xénero. A iniciativa, que se presentará no próximo período de sesións, demanda a creación de seccións especializadas en Pontevedra, Lugo e Ferrol. Ademais, pide que en Vigo e A Coruña non se poñan en marcha á custa da transformación de xulgados de instrución xa existentes.
A senadora e portavoz de Xustiza do PP, Pepa Pardo, xustifica a iniciativa alegando que a violencia contra a muller é «unha das grandes lacras da nosa sociedade» e que é necesario poñer «todos os medios posibles» para combatela.
«Disparatado» e «un timo»
O PPdeG considera que as recentes decisións do Goberno de Pedro Sánchez, a través do Real Decreto para a dotación de novas prazas e a Lei de medidas en materia de eficiencia do Servizo Público de Xustiza, van «no sentido contrario» ás necesidades reais.
Pepa Pardo asegura que as novas medidas non crean seccións de violencia de xénero onde se prometeu, e que as xa existentes verán aumentada a súa carga de traballo. «Trátase dunha decisión disparatada e dun timo», manifestou Pardo, que insiste na necesidade de crear «xulgados novos, non a transformación nin a sobrecarga de traballo das prazas xa existentes».
Os populares fanse eco das advertencias dos colexios de avogados e procuradores, que xa alertaron do «colapso» que se producirá pola acumulación de asuntos en cidades como Vigo e A Coruña. O PPdeG lembra que a Xunta e o Tribunal Superior de Xustiza de Galicia xa solicitaron ao Ministerio de Xustiza que reconsidere a súa proposta.
