A Unión Comarcal de CCOO de Lugo, a través da súa Comisión Executiva e do Consello Comarcal reunidoen fecha 12/09/2025 —máximo órgano de decisión do sindicato na comarca—, quere denunciar publicamente a situación de hostilidade, bloqueo institucional e ataque á liberdade sindical que están a sufrir os delegados e delegadas do sindicato no Concello de Lugo.
Nos últimos meses, a acción sindical de CCOO na administración local está sendo obxecto de obstáculos deliberados que buscan silenciar e deslexitimar a representación lexítima das traballadoras e traballadores municipais. Esta realidade constitúe unha vulneración grave de dereitos fundamentais recollidos no Estatuto dos Traballadores, na Lei Orgánica de Liberdade Sindical e nos tratados internacionais de dereitos laborais.
Desde CCOO lembramos que o sindicalismo non se mendiga nin se tolera: exercese. Por iso, o Consello Comarcal e a Executiva de CCOO Lugo:
- Respaldarán aos seus delegados e delegadas no Concello de Lugo.
- Denunciarán publicamente calquera intento de represión sindical ou persecución.
- Reforzarán a acción sindical con apoio xurídico, mobilización social e comunicación pública.
- Esixirán ao Goberno municipal un cambio inmediato de actitude, con respecto, diálogo real e garantías para o desenvolvemento pleno da actividade sindical.
CCOO alerta de que a persecución sindical non é só un ataque ao sindicato, senón a toda a clase traballadora: quen pretende calar a CCOO está atentando contra dereitos colectivos conquistados tras décadas de loita.
Esta situación non vai quedar oculta. A resolución aprobada polo Consello e pola Executiva Comarcal será remitida ao Goberno municipal e difundida amplamente para mobilizar o apoio social necesario en defensa da dignidade do sindicalismo de clase.
CCOO de Lugo non vai recuar: fronte á represión sindical, máis organización, máis loita e máis mobilización.
