O concelleiro e voceiro do Goberno municipal, José Manuel Lage, defendeu hoxe a transformación da fachada marítima como un proxecto vital para a cidade. Nunha sesión organizada por Defensa do Común, Lage subliñou os avances acadados no último ano para integrar o porto na paisaxe urbana.
Lage puxo en valor o «esforzo» do goberno de Inés Rey para sentar as bases dunha transformación que, segundo el, «é vital para o futuro da cidade e da súa economía». O voceiro lembrou que en maio de 2024 se asinou un protocolo entre o Concello, a Xunta e o Estado para impulsar a reordenación da fachada marítima. Este acordo permitiu a creación da comisión Coruña Marítima e o inicio dun proceso participativo no que se recolleron propostas da cidadanía.
Para o concelleiro, «o futuro da Coruña pasa polo mar» e este proxecto representa «a oportunidade para abrirnos definitivamente a ese horizonte compartido, cunha visión integradora, sostible e innovadora». Lage destacou a «boa sintonía» coa Autoridade Portuaria e o seu presidente, Martín Fernández Prado, subliñando a importancia de ter chegado a un consenso entre todas as administracións.
O voceiro municipal anunciou que neste mes se dará «un paso máis» para dotar de «máxima seguridade xurídica» o concurso internacional da fachada marítima. O obxectivo é contar cos «mellores profesionais posibles» para un proxecto ambicioso, valorando tanto a experiencia externa como o talento local.
No acto, ademais de Lage, tamén participaron Ruth Varela (presidenta do COAG), Martín Fernández Prado (presidente da Autoridade Portuaria), Francisco Jorquera (presidente da Comisión da Fachada Marítima) e Benedito Álvarez (de Defensa do Común).
