José Luis Novo Teijeiro entra a formar parte da Comisión de Pequenos Concellos do PPdeG e a reforzar tamén a Xunta Directiva do PP da provincia de Lugo. Tras este nomeamento deixará as súas responsabilidades no Concello de Rábade onde era tenente da alcaldesa, Remedios González, e entrará a formar parte da corporación o seguinte na lista, Juan Baroja Ortíz.
Dende o PP lucense indican que este nomeamento é “un sinal de apoio e aposta por persoas que demostran fidelidade ao noso proxecto”. Ademais, destacan “a súa vontade de traballo e a súa vocación de servizo público” cualidades que, sen dúbida, resultan de interese para traballar dende a Comisión autonómica do Partido Popular polos municipios pequenos e rurais, como son a maioría dos concellos da nosa provincia. E engaden que “coa súa experiencia de goberno” contribuirá a achegar coñecementos sobre as necesidades reais dos municipios da Galicia menos poboada.
Novo amosa o seu agradecemento pola “confianza” para este nomeamento e comprométese a traballar “con responsabilidade” do mesmo xeito que no Concello de Rábade, “unha etapa gratificante para min pola cercanía cos veciños e pola oportunidade de servir ao meu pobo”.
De feito, tivo participación activa en proxectos importantes para Rábade que o goberno local desenvolverá nos 2 últimos dous anos de mandato coma o PXOM, o decantador, melloras na ETAP e na avenida de Vilalba.
Pola súa banda, a rexedora rabadense, Remedios González, agradécelle “a súa dedicación durante este tempo e deséxalle sorte nesta nova etapa”.
Asesor fiscal e corredor de seguros xubilado, Novo era o responsable das áreas económicas e de persoal no goberno municipal de Rábade, despois de resultar elixido concelleiro ao concorrer como número 3 da candidatura do Partido Popular nas últimas eleccións municipais. Tamén formou parte da candidatura lucense do Partido Popular ás últimas autonómicas como número 12 da lista.
