O presidente do PPdeG e da Xunta, Alfonso Rueda, subliñou hoxe que facilitar o acceso á vivenda é unha «prioridade» do seu goberno. Durante a Xunta Directiva Provincial do PP da Coruña, Rueda explicou a «folla de ruta clara» da Xunta para actuar nas áreas urbanas con maior demanda, como a cidade da Coruña.
O líder dos populares galegos recordou o seu compromiso de duplicar o parque público de vivenda, pasando de 4.000 a 8.000 vivendas protexidas. Tamén destacou outras medidas xa en marcha, como o programa para mobilizar vivendas baleiras, os avais para a compra de primeira vivenda e as axudas para rehabilitación e eficiencia enerxética. Rueda animou aos alcaldes e voceiros do partido a seguir identificando as necesidades dos seus concellos para que as políticas de vivenda da Xunta cheguen a toda a cidadanía.
A Coruña, referente en I+D+i
No eido da investigación e a innovación, o presidente destacou a importancia de crear unha marca propia de investigación galega para xerar emprego de calidade. Rueda sinalou que a provincia da Coruña está chamada a ser un referente en innovación a través de sectores estratéxicos como o enerxético, o naval, as TIC e as universidades.
Ademais, na reunión interviñeron as conselleiras de Medio Rural (María José Gómez), Vivenda (María Martínez Allegue) e Medio Ambiente (Ángeles Vázquez) para afondar nas medidas extraordinarias de axuda aos afectados polos incendios forestais. O presidente subliñou que, a pesar de que a provincia non foi a máis castigada, tamén houbo lumes en Muxía, e reiterou que se actuará con «toda a firmeza da lei» contra os incendiarios.
«A Coruña quere máis PP que nunca», proclama Diego Calvo
Pola súa banda, o presidente provincial do PP da Coruña, Diego Calvo, deu a benvida aos tres novos alcaldes do partido na provincia: Luis Insua (Fisterra), José Luis Fernández Mouriño (Carral) e Esteban Ares (Lousame).
Coa vista posta nas próximas eleccións municipais, Calvo amosouse convencido de que en 2027 a provincia «falará alto e claro dicindo que quere PP e máis PP que nunca». Finalmente, fixo extensivo este desexo de cambio a nivel nacional, asegurando que España necesita «un Goberno como o galego, que funcione, que cumpra e que se ocupe e preocupe dos problemas da súa xente».
