O presidente da Xunta, Alfonso Rueda, salientou hoxe en Bos Aires a «fortaleza e vixencia dos lazos» entre Galicia e a Arxentina durante o acto de celebración do Día da Hispanidade na Embaixada de España, onde Galicia participou como Comunidade convidada de honra.
Acompañado polo conselleiro de Emprego, Comercio e Emigración, José González, e o secretario xeral da Emigración, Antonio Rodríguez Miranda, Rueda agradeceu a acollida e o papel da colectividade galega.
Recoñecemento á colectividade galega
O titular do Goberno galego incidiu no papel esencial da colectividade galega neste país, que mantivo viva a conexión coa terra. Rueda recoñeceu que Bos Aires «sente Galicia como algo propio» e enviou unha mensaxe de gratitude:
Agradézolle moitísimo ao embaixador a oportunidade de dirixirme a todos vostedes para darlles as grazas polo que esta nación arxentina ha suposto na construción de Galicia”, salientou o presidente.
Rueda subliñou que o vínculo histórico non se debilitou, senón que se fixo máis forte, convertendo a Galicia nunha terra que convida a regresar: «Aquí lográmolo con especial intensidade», apuntou, en referencia á capacidade de integrarse mantendo a identidade propia.
Galicia Retorna e Galicia Calidade
No acto, o presidente destacou que Galicia quere seguir sendo unha terra de «oportunidades e de benvidas», líder en proxectos de innovación e industria sostible.
Neste contexto, puxo en valor a Estratexia Galicia Retorna, o plan integral da Xunta para converter a comunidade en referente en políticas de regreso, con apoio ao emprego, formación, emprendemento e acceso á vivenda.
Na primeira edición da Estratexia (2018-2022) retornaron máis de 28.000 persoas, e o obxectivo actual é que outras 30.000 o fagan antes de 2026. «Conten con toda a nosa axuda para poder atopar as súas raíces», asegurou Rueda.
Así mesmo, o presidente salientou a marca Galicia Calidade como moito máis ca un selo de orixe, sendo a «carta de presentación de Galicia ante o mundo».
“Galicia Calidade… é unha mostra ao mundo desa Galicia potente, moderna, que se renovou, que ten empresas de referencia a nivel mundial”, destacou o presidente, subliñando que representa a confianza, a excelencia e o compromiso co ben facer.
Para rematar, Rueda invitou a todos os presentes a facer o Camiño de Santiago, recordando que o ano 2027 é Xacobeo: «Espéroos a todos, como moi tarde -se pode ser antes, moito mellor- no 2027 en Galicia Calidade». O titular do Executivo concluíu reivindicando unha Galicia moderna, orgullosa das súas raíces, aberta á cooperación e que ofrece «calidade, estabilidade e confianza».
