O pasado xoves 16 de outubro Lugo viviu unha desas tardes que deixan pegada. O paseo guiado “Arte nas rúas de Lugo”, promovido e conducido por Guido Guía, reuniu a oito dos máis destacados muralistas da cidade —auténticas referencias da arte urbana galega e tamén internacional— nun encontro histórico que xuntou tres décadas de creación, amizade e compromiso coa cultura local.
Baixo un sol outonal e cun público entregado —máis de corenta participantes—, a ruta percorreu os murais e graffitis máis emblemáticos do centro da cidade e a súa contorna. En cada parada, Guido, que leva máis de dez anos divulgando a arte urbana lucense e superou xa o cento de visitas guiadas pola Arte Urbana Lucense, compartiu historias, anécdotas e emocións acumuladas ao longo dunha década de traballo apaixonado.
Acompañándoo nesta ocasión tan especial estiveron Diego AS, Pablo Lage (Van-Kraft), Iago Eireos, Yoe33, Dani (Muro Mola), Rubén Paz (Trece Trazos), Kutxyllo e Bure (Concepto Circo): oito muralistas que representan ás dúas xeracións máis influentes da arte urbana lucense —Concepto Circo e Otro Prisma—, así como os impulsores dos festivais máis importantes da historia recente de Lugo (Style Fighters Fest, Prisma Fest, Culturbán e Urban Cores).
O paseo converteuse nun reencontro entre mestres e discípulos, entre pioneiros e continuadores dun movemento que xa é parte da identidade lucense. Os clásicos, como Bure, Yoe 33 e Van-Kraft, lembraron os anos 90, cando pintar nas paredes era un acto de liberdade e risco. As xeracións seguintes, encabezadas por artistas premiados internacionalmente como Diego AS ou Rubén Paz recoñecen e reivindican sempre a inspiración que recibiron da vella escola.
“Foi a mellor actividade dende que son guía”, confesou Guido ao rematar o percorrido. “Levo toda a miña vida admirando a esta xente, e ver xuntos a tantos artistas que admiro, compartindo co público o que significa pintar e vivir en Lugo, foi algo memorable e inesquecible.”
A presenza de artistas doutras disciplinas —Xoán Vila, Miguel Anxo Macía, José Manuel Peña Romay, Noa Persan, Juan Pablo Mastroianni, Joaquín García Gesto e Miki— e o apoio dos que non puideron asistir, como Noemí Núñez, Pía Piadosa, Bublegum, Nesui, Borja Porto (Arte Lucus), Mousca e Joint, reforzaron o sentido comunitario dun encontro que transcendeu o simple paseo.
O evento consolidou a Lugo como un referente da arte urbana galega e internacional. Grazas ao inmenso talento e creatividade dos artistas, sumado ao traballo de divulgación feito por profesionais como Guido, a cidade pode presumir de ter unha das escenas murais máis vivas e diversas do planeta.
Ao final da tarde, cando o grupo se disolvía entre murais e sombras, Guido resumiu o espírito do día cunha frase que fixo sorrir a todos: “Os graffiteiros e muralistas de Lugo merecen un monumento. Son parte da nosa historia recente, os que demostraron que dende esta pequena gran cidade se poden facer cousas incribles.”
