A banda celebrará no 2026 15 anos sobre os escenarios co lanzamento dun álbum producido por Raúl Pérez (La Mina).
Familia Caamagno festexará 15 anos sobre os escenarios o ano que vén. O quinteto celebrará a efeméride coa publicación dun novo disco, do que hoxe lanza o primeiro avance, ‘De paseo en Portugal’, e que xa se pode escoitar nas principais plataformas dixitais. Un tema pop, cun estribillo luminoso e catártico, que dá boa conta de todo o que está por vir.
O sinxelo, o primeiro dos tres que se darán a coñecer nas vindeiras semanas -antes da publicación do álbum que editará o selo Tremendo Audiovisual-, conta cun video animación dirixido polo premiado Xaime Miranda e que se poderá ver desde as 12.00 horas deste xoves 27 na canle de Youtube da banda de Sigüeiro.
Familia Caamagno, o quinteto co directo máis divertido e poderoso da escena galega, regresará aos escenarios a principios de 2026. No mes de xaneiro, o grupo presentará o seu terceiro disco longo, producido por Raúl Pérez, do estudio granadino La Mina (espazo no que gravan algunhas das bandas de pop e rock máis coñecidas a nivel estatal, e que vén de ser galardoado nos Latin Grammy polas súas mesturas).
‘DE PASEO EN PORTUGAL’ , DE FAMILIA CAAMAGNO
Lanzamento: 27 de novembro de 2025
Enlace: https://orcd.co/familiacaamagno_paseoportugal
