O voceiro de UCIN Galicia, José Luis Calo, reclama unha transformación profunda e inmediata na xestión da antiga Compañía de Radio-Televisión de Galicia (CRTVG), agora CSAG (Corporación de Servizos Audiovisuais de Galicia), José Luis Calo instou á Xunta de Galicia a «cesar de inmediato o control férreo e partidista» que, ao seu xuízo, asfixia a pluralidade dos medios públicos galegos.
Para o líder de UCIN Galicia, a situación actual da televisión e radio autonómicas é «insostible» e afástase da súa misión fundacional de servizo público. Calo sinalou que a manipulación informativa e o uso dos medios como ferramentas de propaganda política están degradando a confianza dos galegos na súa propia televisión.
A TVG e a Radio Galega debe ser a casa de todos os galegos, non o gabinete de prensa do partido de quenda. Esiximos un xiro de 180 graos onde prime o criterio profesional e a obxectividade por riba do carné político«, afirmou José Luis Calo.
Desde UCIN Galicia propoñen unha serie de medidas urxentes para democratizar o ente público:
- Elección por consenso: Que a dirección da CRTVG sexa elixida por consenso no Parlamento, garantindo un perfil profesional e independente.
- Consello de Informativos: Reforzar a independencia dos xornalistas para evitar presións dos «enchufados» polo Partido Popular controlando a elaboración de noticias.
- Transparencia orzamentaria: Un control máis rigoroso do gasto público para asegurar que cada euro investido se destine a xerar contido de calidade e apoio ao sector audiovisual galego, nunca para favorecer as produtoras dos amigos e persoas afíns ao PP.
Calo concluíu advertindo que UCIN Galicia non deixará de denunciar calquera intento de utilizar o erario público para beneficiar estratexias electorais. «É hora de devolverlle a voz aos profesionais do medio e a dignidade a unha institución que é patrimonio de todos os galegos».
