Coma no resto de Galiza é preocupante a falta de planificación e previsión. “En todo o país observamos como soben os prezos tanto para comprar como para alugar mentres descende ou desaparece o acceso á vivenda pública” di o corpo da moción que defenderá o grupo municipal nacionalista.
Nin a Constitución de 1978 (Artigo 47) nin a actual lei estatal 12/2023 de 24 de maio, polo dereito a vivenda dan solucións. Así as vivendas sociais no ámbito galego nestes últimos 14 anos é un páramo en materia de vivendas públicas. Os datos falan por si sós e o parque galego de vivenda pública en alugueiro que en Europa é o 9,3%, en Galiza non acada o 1%.
Dodro non é alleo por desgraza a esta realidade. “O esquecemento e abandono do noso rural tamén é a falta de vivenda digna para moitos colectivos que ven como escasean as vivendas fronte a un incontrolado boom de aloxamentos turísticos na nosa comarca.” Asegura Xoán Bautista Mariño preocupado desde o BNG polas persoas mozas que teñen que atrasar a idade de emancipación polas súas dificultades para a incorporación ao mercado de traballo; preocupación que se estende ao drama de persoas separadas, en risco de perda da súa vivenda, persoas con poucos medios, persoas que teñen traballos temporais no noso municipio ou comarca ou persoas inmigrantes que non logran atopar vivenda digna.
Por todo isto que lle trasladan as persoas afectadas, o BNG de Dodro quere o apoio plenario para que desde o goberno socialista en minoría, desde a Xunta e mesmo desde o Estado se cree unha bolsa de vivendas e se establezan liñas de axudas para a rehabilitación e creación de vivenda en Dodro.
