O martes 24 de marzo, ás 19:00 horas, terá lugar no Centro Sociocultural de Baio (Zas) o acto de clausura e entrega de diplomas da oitava edición do Programa de Democratización do Coñecemento, impulsado pola Universidade Sénior da Universidade da Coruña e dirixido a persoas maiores de 50 anos da Costa da Morte. Nesta edición, preto de 80 participantes tomaron parte nesta iniciativa formativa.
A Universidade Sénior, o Programa Universitario para Maiores de 50 anos da Universidade da Coruña, desenvolveu unha nova edición desta proposta educativa, financiada pola Xunta de Galicia e realizada en colaboración co GDR “Costa da Morte” e mailo Concello de Zas. O programa tivo lugar no Centro Sociocultural de Baio durante os meses de febreiro e marzo.
Un total de 80 persoas maiores de 50 anos participaron nesta edición, que concluirá o martes 24 de marzo, ás 19:00 horas, co acto oficial de clausura e entrega de diplomas, que contará coa presenza da directora da Universidade Sénior, Matilde García Sánchez; de Susana Iglesias Antelo, adxunta a dirección da Universidade Sénior, e do presidente do GDR “Costa da Morte” e alcalde de Zas, Manuel Muiño Espasandín.
Con este programa, a Universidade Sénior reafirma o seu compromiso de achegar a formación universitaria á cidadanía maior da Costa da Morte, respondendo ás súas inquietudes e necesidades educativas dende a primeira edición do Programa de Democratización do Coñecemento no ano 2018.
