O Bloque Nacionalista Galego (BNG) reclamou hoxe ao Goberno do Estado a adopción inmediata de medidas preventivas e unha actuación firme para garantir a seguranza da nova misión da Flotilla a Gaza. A iniciativa, impulsada pola rede internacional Global Sumud, contará coa participación de seis representantes da Galiza nunha expedición civil e humanitaria que ten como obxectivo romper o bloqueo ilegal de Israel.
Denuncia da «actitude pasiva» do Executivo
A formación nacionalista considera «imprescindíbel» que o Goberno español abandone a súa actual pasividade. O BNG lembra que as anteriores expedicións foron obxecto de ataques, asaltos violentos e detencións ilegais por parte de Israel.
O deputado no Congreso, Néstor Rego, exixiu a activación de todos os mecanismos diplomáticos e políticos antes da partida das embarcacións: «Cómpre garantir o cumprimento do dereito internacional e a libre navegación en augas internacionais para impedir novas agresións extraterritoriais por parte do Estado de Israel»
Pola súa banda, a senadora Carme da Silva puxo o foco na necesidade de estabelecer unha canle de comunicación permanente coa Flotilla desde o inicio da travesía. Para a senadora, é vital garantir unha asistencia e seguimento continuo que asegure unha resposta inmediata ante calquera incidente ou provocación armada.
Acción proactiva e internacional
O BNG incide en que o Goberno debe liderar unha fronte diplomática con outros países participantes na Global Sumud para:
- Garantir a integridade das embarcacións e das persoas fronte a posibles bombardeos ou asaltos.
- Obrigar a Israel a respectar o Dereito Internacional.
- Manter interlocución directa coa delegación galega para velar pola súa seguranza.
A organización nacionalista reafirma o seu compromiso cunha «Palestina libre e en paz» e reclama que o Estado español dea un respaldo «claro e inequívoco» a esta acción humanitaria que leva axuda sanitaria e educativa á faixa de Gaza.
