Un ano máis, os sindicatos combativos CGT, CNT, CUT e SE percorreron conxuntamente as rúas da Coruña con motivo do Primeiro de Maio. A manifestación partiu ás 12.30 desde a praza de Pontevedra e finalizou no Campo da Leña, baixo o lema “contra a guerra e o empobrecemento social”.
Centos de persoas traballadoras participaron na mobilización, na que se corearon consignas contra as guerras de Estados Unidos e Israel, o xenocidio en Gaza e a invasión do Líbano. Así mesmo, denunciáronse as prácticas especulativas en ámbitos como a vivenda, os alimentos e os carburantes.
Desde a CGT sinalan que a clase traballadora está a sufrir un forte proceso de empobrecemento, xa que á precariedade laboral e salarial se engaden os elevados prezos da vivenda, dos alimentos e dos combustibles. Todo isto, afirman, está provocado por especuladores e por unha oligarquía política que fai negocio co sufrimento humano e coa destrución.
Ao remate da manifestación leuse un manifesto no que se recolleron as principais reivindicacións e solidariedades do movemento.
En primeiro lugar, expresouse a solidariedade cos pobos que están a ser vítimas de guerras coloniais, como o palestino, o libanés ou o venezolano, entre outros, e reivindicouse a súa soberanía.
No ámbito laboral, fixo unha mención especial ás condicións de traballo. Entre as principais demandas destacan a redución da xornada laboral, a derrogación das reformas laborais e a necesidade de subas salariais xustas sen tomar como referencia o IPC, ao considerar que non reflicte o custo real da vida. Así mesmo, reclamouse a redistribución dos beneficios indecentes das empresas.
Neste mesmo bloque mencionáronse algunhas das loitas obreiras activas no Estado, como a do persoal de Navantia en San Fernando, a folga nas escolas infantís e casos de represión como o das Seis da Suíza. Neste sentido, esixiuse a derrogación das leis que reprimen a clase traballadora e atacan o sindicalismo.
No plano internacional e político, rexeitouse o aumento do gasto en armamento impulsado polos gobernos da OTAN, en particular polo Goberno español, ao que acusan de realizar un dos maiores incrementos do gasto militar da historia recente por orde expresa de Donald Trump. Denúnciase que o diñeiro público, que debería destinarse a sanidade, educación, transporte, dereitos sociais ou vivenda, está a ser derivado á industria armamentística.
Tampouco faltou o rexeitamento aos feminicidios, á brecha salarial, á violencia machista e ao acoso por razón de xénero. Ao mesmo tempo, lembrouse que as mulleres traballadoras sofren de maneira especialmente intensa as consecuencias das guerras, xa que os seus corpos se converten en campos de batalla, especialmente no caso de mulleres racializadas ou migrantes.
O manifesto concluíu cun chamamento á organización e mobilización da clase traballadora como resposta ao avance do fascismo, o racismo e o empobrecemento da maioría social. Denunciouse tamén que o sistema capitalista, na súa actual fase de crise, tenta impor a idea de que non é posible imaxinar un mundo máis xusto, diverso e con dereitos para todas as persoas traballadoras, con independencia da súa orixe.
Por último, a CGT fixo un chamamento á mobilización polo acceso á vivenda e contra o “roubo” que, denuncian, sofren cada mes persoas traballadoras e pensionistas por parte de caseiros e entidades bancarias. Neste sentido, animan a participar na manifestación convocada para o próximo 6 de xuño na Coruña, que partirá ás 12.00 desde a Delegación do Goberno.
