O Partido Popular, a través do senador José Manuel Balseiro, rexistrou unha iniciativa no Senado para esixir ao Goberno de Pedro Sánchez que garanta o acceso aos servizos de telefonía móbil e de fibra óptica na totalidade da provincia de Lugo.
A proposta pon o foco na necesidade de implementar plans específicos deseñados para o medio rural, co obxectivo de corrixir a actual fenda dixital que sofren numerosos núcleos de poboación. Segundo o PP, é imperativo que o Executivo central asegure a conectividade en todo o territorio provincial para garantir a igualdade de oportunidades e a viabilidade económica das zonas máis despoboadas.
A iniciativa busca que o Goberno deixe de ignorar as carencias tecnolóxicas no rural lucense e estableza medidas concretas e dotadas orzamentariamente para asegurar infraestruturas de telecomunicacións de calidade en todos os municipios da provincia.
