A alcaldesa de Lugo, Elena Candia, inaugurou esta mañá na Praza Maior a exposición itinerante «Botamos un baile?». Organizada pola Fundación Cidade da Cultura de Galicia, a mostra ofrece un percorrido nostálxico e documental polas orquestras de verbena galegas entre os anos 1919 e 2019.
O emprazamento elixido, o fondo da Praza Maior, garda unha forte carga simbólica por ter sido o escenario real de moitos daqueles bailes que hoxe forman parte da memoria colectiva da cidade.
A través de fotografías, carteis, discos e programas de festas custodiados pola Biblioteca de Galicia, a exposición permite descubrir a evolución destas formacións musicais, clave na identidade e na cultura popular galega do último século.
Durante o acto, Elena Candia destacou o valor de achegar este tipo de iniciativas á rúa para «poñer en valor unha parte esencial do noso patrimonio cultural». A mostra forma parte do programa de itinerancias da Cidade da Cultura, enmarcado no seu Plan Estratéxico 2021-2027, que busca descentralizar o acceso á cultura.
Na presentación tamén participaron os concelleiros de Turismo e Museos, Agustín Gallego, e de Cultura e Educación, Javier Vázquez; a directora xerente da Fundación Cidade da Cultura, Ana Isabel Vázquez Reboredo; a directora de Acción Cultural, Verónica Santos Farto; a xefa do Servizo da Biblioteca de Galicia, Noelia Bascuas Ferreiro; e os comisarios da mostra, Zósimo López Pena e Elena Díaz del Río López.
