O luns haberá unha concentración diante do SMAC da Coruña, coincidindo coa mediación previa ao xuízo pola reclamación de 1,25 millóns de euros formulada pola empresa
A Federación de Servizos de CCOO denuncia o intento de Gadis de coartar o dereito de folga mediante unha demanda na que reclama unha indemnización de 1,25 millóns de euros tras os paros no comercio de alimentación. CCOO, CIG, UGT e USO concentraranse o vindeiro luns, 20 de xullo, ás 9:30 horas, diante da Sección de Mediación, Arbitraxe e Conciliación (SMAC) da Coruña, coincidindo coa celebración do acto de mediación previo ao xuízo.
A empresa fundamenta a súa petición nos supostos prexuízos derivados da folga desenvolvida no almacén da compañía no marco do conflito polo convenio colectivo provincial de alimentación. CCOO-Servizos denuncia que esta actuación constitúe un intento de coartar o exercicio do dereito de folga, un dereito fundamental recoñecido pola Constitución e unha ferramenta esencial para que as persoas traballadoras poidan defender os seus intereses fronte ás empresas.
Segundo o sindicato, a reclamación económica presentada por Gadis pretende infundir medo entre as persoas traballadoras e as organizacións sindicais, tratando de disuadir a participación en futuras mobilizacións e cuestionando o exercicio dun dereito plenamente amparado polo ordenamento xurídico.
Estratexia de presión da empresa
CCOO considera especialmente preocupante que unha empresa pretenda responsabilizar economicamente os sindicatos polas consecuencias dunha folga legalmente convocada e secundada polas persoas traballadoras. Ao seu xuízo, este tipo de actuacións constitúen unha estratexia de presión orientada a debilitar a acción sindical e limitar a capacidade de resposta da clase traballadora ante os conflitos laborais.
Neste contexto, CCOO-Servizos asegura que non se deixará amedrentar por esta actuación empresarial e critica que Gadis manteña esta estratexia mentres, segundo afirma o sindicato, acumula millóns de euros en beneficios. A organización considera que esta demanda evidencia que a defensa dos dereitos das persoas traballadoras non figura entre as prioridades da empresa.
| Convocatoria: Día: luns, 20 de xullo do 2026Hora: 9:30 horas Lugar: Sección de Mediación, Arbitraxe e Conciliación (SMAC) da Coruña (rúa María Victoria Fernández-España, 1 baixo, 15002 A Coruña) Asunto: CCOO, CIG, UGT e USO concéntranse diante da Sección de Mediación, Arbitraxe e Conciliación (SMAC) da Coruña, coincidindo coa celebración do acto de mediación previo ao xuízo por unha demanda de Gadi |
