A alcaldesa de Lugo, Elena Candia, e a concelleira de Participación e Servizos á Veciñanza, Mar Carballas, mantiveron esta semana unha reunión de seguimento co director de TEVA S.L., Raúl García Platas, empresa adxudicataria do contrato para a subministración e instalación do sistema de cámaras da Zona de Baixas Emisións (ZBE).
Durante o encontro, a empresa confirmou que xa se iniciaron os traballos e trasladou ao Concello o seu compromiso de cumprir co prazo de execución, de maneira que a instalación estea rematada a finais de agosto.
A actuación, cun investimento de 703.822 euros, continúa avanzando segundo o establecido para dotar a cidade da infraestrutura tecnolóxica necesaria para poñer en marcha a ZBE.
A colocación destes dispositivos é un paso imprescindible. O contrato inclúe tanto o hardware necesario —cámaras, sensores, paneis informativos dinámicos, servidores e outros dispositivos— como o software de control e monitorización encargado de xestionar os datos das matrículas captadas.
Neste contexto, o goberno local informou de que levará ao pleno ordinario deste mes de xullo a ordenanza reguladora da circulación no centro histórico como Zona de Baixas Emisións. A súa aprobación permitirá culminar a implantación da ZBE en cumprimento da normativa europea, que esixe estas zonas en cidades de máis de 50.000 habitantes. O obxectivo é que estea lista antes do 30 de setembro deste ano para contribuír á mellora da calidade do aire e á redución de emisións.
Con todo, o goberno local decidiu incorporar ao texto un período de adaptación dun ano. Durante ese tempo, o Concello centrará os seus esforzos en informar á cidadanía sobre o funcionamento da ZBE, facilitando que veciños e visitantes se familiaricen coa nova regulación antes de aplicar sancións.
