Galiza Nova, organización xuvenil do BNG, levou a cabo este domingo 19 de xullo en Corcubión un acto público, enmarcado na celebración de diversos eventos da VIII Semana da Patria Galega, organizada pola formación que aglutina á mocidade do Bloque.
No acto, desenvolvido na Praza Castelao, falouse das principais problemáticas que afronta a mocidade. Artai Gabiás, secretario xeral de Galiza Nova; Alba Regueiro, da Permanente da formación xuvenil; e Oscar Insua, deputado do BNG no Parlamento galego, tomaron a palabra e abordaron cuestións de suma importancia para a mocidade: problemas de acceso á vivenda; a falta de traballo digno que obriga a emigrar; a precariedade laboral; un transporte público con rutas, frecuencias e horarios inapropiados; ou a carencia de infraestruturas axeitadas, que merma o desenvolvemento da Costa da Morte.
Houbo tamén un chamamento a participar nas actividades programadas na Semana da Patria, así como na manifestación nacional que terá lugar o sábado 25 de xullo, as 12:00 horas, en Santiago de Compostela.
Non faltaron mencións á situación internacional, con guerras imperialistas patrocinadas polos Estados Unidos, e o xenocidio que sufre Palestina de mans do sionismo israelí. Fíxose pé no carácter internacionalista e antiimperialista do BNG, e púxose en valor a importancia e a necesidade de contar cunha ferramenta que xunta á mocidade nacionalista para tentar construír un país mellor, como é Galiza Nova.
Ao acto acudiron representantes do equipo de goberno do BNG de Corcubión, así como cargos da formación nacionalista dos diferentes municipios da Costa da Morte.
