O coordinador de UCIN Lugo, Alfonso Hortas, amosou a súa preocupación polo debate arredor do proxecto da Avenida da Coruña e criticou que responsables de anteriores gobernos municipais «pretendan agora dar leccións e atribuírse decisións que nunca chegaron a consolidar».
Segundo Hortas, a realidade que trasladan comerciantes e veciños dista moito da versión oficial: «O centro histórico e comercial de Lugo leva anos perdendo actividade, cun aumento de locais baleiros e serias dificultades para acceder en vehículo e atopar aparcamento».
O impacto na clientela da comarca
Desde a formación lembran que unha parte fundamental do negocio local procede de municipios da contorna como Outeiro de Rei, Castro de Rei ou Guntín. «Son moitas as persoas que nos trasladan que desprazarse ao centro converteuse nuna auténtica odisea, o que acaba repercutindo negativamente nas compras», afirmou Hortas.
Neste contexto, UCIN valora de xeito positivo a rectificación do proxecto previsto para a Avenida da Coruña, ao entender que a cidade precisa «accesos cómodos, mobilidade eficiente e oferta suficiente de aparcamento».»Non se trata de encher Lugo de coches, senón de eliminar barreiras para que quen queira mercar, consumir ou gozar da cidade poida facelo con comodidade», subliñou o coordinador de UCIN Lugo.
Crítica ás alternativas afastadas da realidade
Mención aparte fixo ás propostas que apostan por aparcar nas afores e desprazarse en transporte público. Para Hortas, este tipo de medidas «poden resultar atractivas sobre o papel, pero non responden ás necesidades reais de quen realiza compras e necesita regresar ao seu vehículo con facilidade».
UCIN Lugo concluíu facendo un chamamento a gobernar «con sentido común» e deseñar un modelo de cidade accesible, dinámico e consensuado cos sectores económicos que manteñen viva a economía local«.
